තෙරුවන් සරණයි සියලු දෙනාටම!
වර්තමානයේ බොහෝ දෙනෙක් අප වෙත කතා කර පොදුවේ විමසන කාරණාවක් තමයි අමනුෂ්ය ප්රශ්න, එනම් නොපෙනෙන ලෝකයේ බලවේග වලින් ඇතිවන ගැටලු.
මෙම ලිපියෙන්, එම ගැටලු සඳහා බුදු දහම ඇසුරින්, බුදුරජාණන් වහන්සේ අපට පෙන්වා දුන් මග ඔස්සේ මෙන්ම, අපගේ ප්රායෝගික අත්දැකීම් සහ පරීක්ෂණ වලින් ලද නිගමන මත පදනම්ව, පොදු පිළියම් කිහිපයක් ඔබ වෙත ගෙන ඒමට බලාපොරොත්තු වෙනවා.මෙම පැහැදිලි කිරීම තරමක් දීර්ඝ විය හැකි බැවින්, සම්පූර්ණ ලිපියම හොඳින් කියවා, එහි අන්තර්ගතය ගැන මෙනෙහි කර, ඉන්පසු ඒ අනුව ක්රියාත්මක වීමට තීරණය කරන මෙන් කාරුණිකව ඉල්ලා සිටිනවා. මෙම විසඳුම් ඔබගේ ජීවිතයට ආලෝකයක් වේවායි අපි ප්රාර්ථනා කරනවා.
ජනතාව අතර පවතින පොදු අමනුෂ්ය බලපෑම් සහ ගැටලු
බොහෝ දෙනෙක් අප හා සම්බන්ධ වී පවසන පොදු ගැටලු රාශියක් තිබෙනවා. මේවා තේරුම් ගැනීම, විසඳුම් සෙවීමේ පළමු පියවරයි.
- කොඩිවිණ සහ හදි හූනියම්: “අපිට කොඩිවිණ කරලා”, “අල්ලපු ගෙදරින් හූනියමක් කරලා”, “ඥාතියෙක් අණවිණයක් කරලා” යනාදී වශයෙන් දේශීයව මෙන්ම විදේශගත ශ්රී ලාංකිකයන් පවා, විවිධ ආගම් වලට අයත් අය පවා මේ ගැන පවසනවා.
- ප්රේත බලපෑම්: “ගෙදර ප්රේත බැල්මක් තියෙනවා”, “ගෙදර ප්රේත ගඳක් එනවා”, “අඳුනකින් බැලුවම ප්රේතයෝ ඉන්නවා කිව්වා” වැනි කාරණා බහුලව අසන්නට ලැබෙනවා. සමහරු ප්රේතයන්ව දැක ඇති බවට පවා පවසනවා.
- යක්ෂ බලපෑම්: කොට, මහත, උල් දත් ඇති බියකරු යක්ෂයන් දුටු බවත්, යක්ෂයන් ඇඟට ආවේශ වන බවත් සමහරු පවසනවා.
- හඳුනා නොගත් රෝගාබාධ: වසර ගණනාවක් පුරා පවතින සුව නොවන තුවාල, පිළිකා, උණ, කලන්තය, කරකැවිල්ල, වමනය වැනි රෝගාබාධ සඳහා බටහිර වෛද්ය විද්යාවෙන් හෝ දේවාල වලින් හෝ පිළියමක් නොලැබුණු බව බොහෝ දෙනෙක් කනගාටුවෙන් පවසනවා.
- නිදන් හෑරීමේ විපත්: අපට පෙර පිනකින් උරුම නැති නිදන් ගැනීමට ගොස්, ඒවා ආරක්ෂා කරන බහිරවයන් වැනි අමනුෂ්ය බලවේග වල උදහසට ලක්වී, ලෙඩ රෝග වලට ගොදුරු වී, උපයන ධනය දවසින් දෙකින් විනාශ වී යන බවට පැමිණිලි ලැබෙනවා.
- කළු කුමාර සහ කාම ප්රේත බලපෑම්: විශේෂයෙන්ම තරුණියන්ට බලපාන ‘කළු කුමාරයාගේ බැල්ම‘ ගැන බොහෝ දෙනෙක් පවසනවා. මෙය කාම ලෝකයේ සිටින, කාමයට කැමති අය හා බැඳීමට උත්සාහ කරන අමනුෂ්යයෙක්. එලෙසම, අධික රාගාශාවන් ඇති පුරුෂයන් වටා එක්වන ‘කාම ප්රේතයන්‘ ද සිටිනවා. ඔවුන් එම රාගික සිතුවිලි සහ ශරීරයෙන් නිපදවන දේ ආහාරයට ගනිමින්, එම පුද්ගලයා තව තවත් ඒ සඳහා පොළඹවනවා.
- මහාසෝනා බැල්ම: මහාසෝනාගෙන් කරදර ඇති බවට ද සමහරු පවසනවා.
- දේවාල වලින් වන කරදර: සමහර දේවාල වල සිටින අය, තමන්ගේ මන්ත්ර ශාස්ත්රයේ බලය පරීක්ෂා කිරීමට අන් අයට කොඩිවිණ, අණවිණ කරන බවට ද චෝදනා එල්ල වෙනවා.
- බුදුන් වැඳීමට නොහැකි වීම: බුදු පහන තියන්නට නොහැකිව අත් වෙව්ලීම, දහඩිය දැමීම, බුදු පිළිමය දෙස බැලීමට නොහැකි වීම වැනි දේ සිදුවෙනවා නම්, එයත් පැහැදිලිවම යම් අමනුෂ්ය ප්රශ්නයක් පවතින බවට ලකුණක්. ලොව්තුරා බුදුරජාණන් වහන්සේට වන්දනා කිරීමට බාධා පැමිණීම සුළුපටු කාරණයක් නොවේ.
මේ අපට ලැබෙන පැමිණිලි වලින් කිහිපයක් පමණයි. මෙම ලිපියෙන් ලබා දෙන පොදු ක්රමය අනුගමනය කිරීමෙන් මේ සියලු අමනුෂ්ය ප්රශ්න සම්පූර්ණයෙන්ම මැඩ පවත්වා ගැනීමට ඔබට හැකියාව ලැබෙනවා.
අමනුෂ්යයන් සැබවින්ම සිටීද? බෞද්ධ දර්ශනයේ පිළිතුර
සමහරු “අමනුෂ්යයන් කියා කොටසක් නැහැ” යැයි තර්ක කරනවා. බුදු දහම තුළ මේ සඳහා පැහැදිලි පිළිතුරක් තිබෙනවා.
බුද්ධ දේශනාවේ සාක්ෂි: ධම්මපදට්ඨකථාවේ එන දීඝායු කුමාරයාගේ කතාව කියවන්න. එහි, ආයු නම් කුමාරයෙකුට යක්ෂයෙකුගෙන් බලපෑමක් තිබූ බවත්, බුදුරජාණන් වහන්සේ ඇතුළු මහා සංඝරත්නය දින හතක් රතන සූත්රය සජ්ජායනා කිරීමෙන් එම බලපෑම දුරු වී, පෙර අකුසල කර්මයක් නිසා කෙටි වී තිබූ ආයුෂ දික් වූ බවත් සඳහන් වෙනවා. මෙය අමනුෂ්ය ප්රශ්න පිළිබඳව ත්රිපිටකයේ එන එක් උදාහරණයක් පමණයි.
සංසාරය සහ භව තල: අපි නිවන් දකින්නට උත්සාහ කරන්නේ ඇයි? මේ සංසාරයේ, එනම් නැවත නැවත ඉපදීමේ චක්රයේ පවතින දුක නිසයි. බුදු දහමට අනුව, අප සැරිසරන භව තල 31ක් තිබෙනවා. මනුෂ්ය ලෝකය, දිව්ය ලෝක 6, බ්රහ්ම ලෝක 20 සහ සතර අපාය (දුක්ඛිත තල හතර) එම 31ට ඇතුළත්. මේ සතර අපාය යනු නිරය, තිරිසන්, අසුර සහ ප්රේත යන ලෝකයි.
ප්රේත යනු කවුද?
ඔවුන් යනු අකුසල කර්ම, එනම් අහිතකර ක්රියාවන්හි විපාක ලෙස දුක්ඛිත තත්ත්වයක ඉපදුනු අමනුෂ්ය කොටසක්. ඉතින්, අමනුෂ්යයන් නැතැයි කීම, සතර අපායක් නැතැයි කීම හා සමානයි. එසේ නම්, අපට නිවන් දැකීමේ අවශ්යතාවයක් ද නැහැ.
‘හොල්මන්’ සහ ‘අමනුෂ්ය’ පටලවා ගැනීම: බොහෝ අය ‘හොල්මන්‘ (සෙලවෙන මනස) සහ ‘අමනුෂ්ය‘ යන වචන පටලවා ගන්නවා. අමනුෂ්යයන් යනු වෙනත් කොහේවත් සිටින අය නොව, මරණයට පත් වූ මිනිසුන්ම තම තමන්ගේ පින් පව් අනුව, මරණාසන්න මොහොතේ සිතට නැගෙන අරමුණ (චුති සිත) අනුව විවිධ තලවල උත්පත්තිය ලැබීමයි.
අමනුෂ්යයන් නැතැයි කීම, සසර පැවැත්ම සහ කර්ම විපාකය ප්රතික්ෂේප කිරීමක්. එය මිත්යා දෘෂ්ටියක්, එනම් වැරදි දැක්මක්. රේරුකානේ චන්දවිමල නාහිමියන්ගේ ‘චතුරාර්ය සත්යය‘ වැනි ග්රන්ථ කියවීමෙන් මේ පිළිබඳව ඔබට තවදුරටත් කරුණු වටහා ගත හැකියි.
අපගේ ප්රායෝගික අත්දැකීම් සහ සාර්ථක ප්රතිඵල
වර්තමානයේ අප මුහුණදුන් සහ විසඳුම් ලබාදුන් සත්ය සිදුවීම් කිහිපයක් ඔබගේ අවබෝධය සඳහා මෙසේ දක්වනවා.
වරක් කාන්තාවක් අප හමුවීමට පැමිණියා. ඇගේ කකුලේ උදැල්ලක් වැදී ඇතිවූ කුඩා තුවාලයක් වසරක් තිස්සේ සුව නොවී තිබුණා. ඒ සඳහා ඇය ලක්ෂ පහක් පමණ වියදම් කර තිබුණත්, කිසිදු බටහිර ප්රතිකාරයකින් සුවයක් ලැබී තිබුණේ නැහැ. අප සොයා බැලීමේදී, ඇගේ මියගිය ආච්චි අමනුෂ්ය ආත්මයක ඉපිද, ඇයව තමන් සිටින ලෝකයට ගැනීමට උත්සාහ කරමින් මෙම තුවාලය සුවවීමට ඉඩ නොදෙන බව හෙළි වුණා. අප ලබාදුන් පිළියම් හතර සහ භාවනා ක්රම අනුගමනය කිරීමෙන් පසු ඇගේ තුවාලය සම්පූර්ණයෙන්ම සුව වුණා.
උපන් දා සිට වසර 30-40ක් පුරා විවිධ අමනුෂ්ය ප්රශ්න සහ ලෙඩ රෝග වලින් පීඩා විඳි අය අපට හමුවී තිබෙනවා. අපගේ උපදෙස් පිළිපැදීමෙන් ඔවුන් බොහෝ දෙනෙක් අද වන විට එම ගැටලු වලින් සම්පූර්ණයෙන් මිදී සිටිනවා.
විදේශ රටවල වෙසෙන ශ්රී ලාංකිකයන්ට පමණක් නොව, විදේශිකයන්ට පවා ඔවුන්ගේ නිවෙස් වල මියගිය අය යක්ෂයන් හෝ ප්රේතයන් වී පීඩා කරන අවස්ථා තිබෙනවා. ධර්මය ගැන අවබෝධයක් නැති, ඇලීමෙන් හා ගැටීමෙන් වෙලී සිටින එම අමනුෂ්යයන්ට පවා අප කියා දෙන පිළිවෙත් මගින් කරුණු පහදා දී එම ස්ථාන වලින් ඉවත් කළ අවස්ථා තිබෙනවා.
අමනුෂ්යයෙකු විසින් ඇතිකළ පිළිකාවක්, මෙම ධර්මානුකූල පිළිවෙත්වල යෙදීමෙන් සම්පූර්ණයෙන්ම සුව වූ අවස්ථා ද අප අත්දැක තිබෙනවා.
මේ අප ලද අත්දැකීම් වලින් කිහිපයක් පමණි. මේවායින් පෙනී යන්නේ මෙම ගැටලු සැබෑ බවත්, ඒවාට නිවැරදි පිළියම් ඇති බවත්ය.
සත්වයින් අමනුෂ්යයන් ලෙස උපදින්නේ ඇයි? හේතු සහ විපාක
ජීවිත කාලය තුළ කරන ක්රියා අනුව මරණින් මතු උත්පත්තිය තීරණය වෙනවා. ප්රේතවස්තු අට්ඨකථාව සහ ත්රිපිටකයේ අන්තර්ගත ප්රේත වස්තු, විමාන වස්තු වැනි කොටස් කියවීමෙන් මේ ගැන මනා අවබෝධයක් ලබාගත හැකියි.
ප්රධාන හේතු කිහිපයක් මෙසේය:
පස් පව් සහ අසංවරකම: පංචශීලය නොරැකීම, එනම් සතුන් මැරීම, සොරකම් කිරීම, කාමයේ වරදවා හැසිරීම, බොරු කීම, සහ මත්ද්රව්ය භාවිතය යන පස් පව් කිරීම සතර අපායේ ඉපදීමට ප්රධාන හේතුවක්. සිත, කය, වචනය යන තුණුරින්ම අසංවර වීම අමනුෂ්ය ප්රශ්න ඇති කරන ආත්ම වලට මග පාදනවා. බුදුරජාණන් වහන්සේ නියපිටට ගත් පස් ස්වල්පයක් වැනි සුළු පිරිසක් පමණක් සුගතියේ උපදින බව දේශනා කර ඇත්තේ මේ නිසයි.
මනුෂ්ය ඝාතන, සත්ව ඝාතන වැනි දරුණු අකුසල් කළ අය බොහෝ විට යක්ෂ හෝ ප්රේත ආත්ම වල ඉපදී තමන් කළ කර්මයට විපාක විඳිනවා.
මරණාසන්න මොහොතේ ඇතිවන සිතුවිල්ල ඉතා ප්රබලයි.
පොළොස් මැල්ලුමකට වැනි දෙයකට දැඩි ආසාවෙන් මියගියහොත්, ඒ පොළොස් ගහේම ප්රේතයෙකු වී ඉපදිය හැකියි. මස් වලට ආසාවෙන් මියගියහොත්, මස් කඩවල් අසල යක්ෂයෙකු වී ඉපදිය හැකියි. ආවේශ වූ විට ඔවුන් ඒ ආහාර ඉල්ලන්නේ මේ ඇලීම නිසයි.
“අනේ මගේ දරුවෝ දාලා යන්න බෑ“, “මගේ ඉඩකඩම් දාලා යන්න බෑ” යන සිතුවිල්ලෙන් මියගියහොත්, ඒ ඉඩම් වල බහිරවයෙකු ලෙස හෝ දරුවන්ගේ හිසේ උකුණෙකු ලෙස පවා ඉපදිය හැකියි.
මේ සියල්ලටම හේතුව සිත, කය, වචනය යන තුන්දොර සංවර කර නොගැනීමයි. බුදුරජාණන් වහන්සේ අපට සංවරකම පුරුදු කරන්නට දේශනා කළේ මෙවැනි දුක්ඛිත ඉරණමකින් අපව ගලවා ගැනීමටයි.
විසඳුම: අනුගමනය කළ යුතු ප්රබල පිළිවෙත් හතර
දැන් ඔබ මෙම අමනුෂ්ය ප්රශ්න පිළිබඳව යම් වැටහීමක් ලබා ඇතැයි සිතනවා. මෙතැන් සිට, මෙම ගැටලු නිරාකරණය කර ගැනීම සඳහා ඔබ විසින් අනුගමනය කළ යුතු, 100%ක් සාර්ථක වන, පිළිවෙත් හතර ගැන මම එකින් එක පැහැදිලි කරන්නම්.
පළමු පිළිවෙත: දෛනික පිරිත් සජ්ඣායනාව සහ බුද්ධ පූජාව
පළමු පියවර වන්නේ දිනපතා වත්පිළිවෙත් වල යෙදීමයි. අධික කාර්යබහුල අයෙකුට වුවද මෙය කළ හැකිය.
කළ යුතු දේ:
- උදෑසන: බුද්ධ පූජාව තබා පිරිත් සජ්ජායනා කරන්න. (මෙයට ඇතුළත් කළ යුතු පිරිත් වෙනත් ලිපියක සඳහන් කර ඇත, නමුත් මෙම පිළිවෙත සඳහා එය අත්යවශ්ය අංගයකි.)
- දහවල්: දහවල් බුද්ධ පූජාව පමණක් පූජා කිරීම ප්රමාණවත්.
- සවස: ගිලන්පස පූජා කර, පිරිත් සජ්ජායනා කරන්න.
කාර්යබහුල අය සඳහා:
ඔබ කාර්යබහුල නම්, දවසට එක් වරක් හෝ, උදෑසනම වැඩට යාමට පෙර හෝ රාත්රියේ වැඩ නිමවී පැමිණි පසු හෝ මෙම වත්පිළිවෙත අනිවාර්යයෙන්ම සිදු කරන්න. ඔබගේ ප්රශ්නය විසඳා ගැනීමට නම්, ඔබගේම උනන්දුව සහ කාලය කළමනාකරණය කරගැනීම අත්යවශ්යයි.
කාල වේලාවන්:
උදේ සහ දහවල් බුද්ධ පූජා සඳහා සම්මත වේලාව වන්නේ උදෑසන 5.00 සිට දහවල් 12.00 දක්වා කාලයයි. ගිලන්පස ඕනෑම වේලාවක පූජා කළ හැකිය. මෙම පළමු පිළිවෙත ඔබගේ ප්රශ්න විසඳා ගැනීමේ අත්තිවාරමයි.
දෙවැනි පිළිවෙත: දස දිසාවට මෛත්රී භාවනාව වැඩීම
දෙවැනි පිළිවෙත වන්නේ මෛත්රී භාවනාවයි. මෙය ඉතා ප්රබල මානසික ශක්තියක් ජනනය කරන අතර, නොපෙනෙන බලවේගයන්ගේ වෛරය දුරු කිරීමට ඉවහල් වේ.
කාලය: කොතරම් කාර්යබහුල වුවත්, දිනකට අවම වශයෙන් පැය භාගයක්වත් මෛත්රී භාවනාවේ යෙදිය යුතුයි. උදෑසනම අවදිවී හෝ රාත්රියේ නින්දට පෙර මේ සඳහා කාලය වෙන් කරගන්න. ඔබට හැකි නම්, දවසට කිහිප වරක් වුවද මෙහි යෙදීමෙන් ප්රතිඵල ඉක්මන් වේ.
භාවනාව වඩන ආකාරය:
- පහසු ඉරියව්වක (පුටුවක, ඇඳ මත හෝ බිම) වාඩි වී ඇස් දෙක පියාගන්න.
- පළමුව උතුරු දිශාව අරමුණු කරගන්න. “උතුරු දිශාවේ සිටින්නා වූ සියලුම සත්වයෝ වෛර නැත්තෝ වෙත්වා! තරහා නැත්තෝ වෙත්වා! ඊර්ෂ්යා නැත්තෝ වෙත්වා! සුවසේ ජීවත් වෙත්වා! නිදුක් වෙත්වා! නීරෝගී වෙත්වා! සුවපත් වෙත්වා! නිවන් ලබත්වා!” යනුවෙන් විනාඩි 3-5ක් පමණ මෙනෙහි කරමින් මෛත්රී චිත්ත ශක්තිය එම දිශාවට යොමු කරන්න.
- එලෙසම, බටහිර, නැගෙනහිර, දකුණ, වයඹ, ඊසාන, ගිනිකොණ, නිරිත යන අනු දිශා හතරටත්, ප්රධාන දිශා හතරටත් එකිනෙකට විනාඩි 3-5 බැගින් මෛත්රී වඩන්න.
- ඉන්පසු උඩ දිශාව (දිව්ය ලෝක, බ්රහ්ම ලෝක, සියලු විශ්වයේ සත්වයන් ඇතුළත්ව) අරමුණු කරගෙන ඒ ආකාරයෙන්ම මෙත් වඩන්න.
- ඉන් අනතුරුව යට දිශාව (සතර අපාය ඇතුළු පහළ තල) අරමුණු කරගෙන ඒ ආකාරයෙන්ම මෙත් වඩන්න.
- අවසානයේ, “දස දිශාවේම සිටින්නා වූ සියලුම සත්වයෝ…” යැයි පවසමින්, සියලුම දිශාවන් එකවර අරමුණු කරගෙන විනාඩි 3-5ක් මෙත් වඩන්න.
මේ සඳහා උපරිම විනාඩි 30ක පමණ කාලයක් ගතවනු ඇත. මෛත්රී භාවනාවේ ආනිසංස 11ක් පිළිබඳව මෙත්තානිසංස සූත්රයේ සඳහන් වේ. ඒ පිළිබඳව ද අධ්යයනය කිරීමෙන් ඔබට තවදුරටත් ශක්තියක් ලැබෙනු ඇත.
මෙම දෙවැනි පිළිවෙත ද අනිවාර්යයෙන්ම කළ යුතු දෙයකි.
තුන්වෙනි පිළිවෙත: ආටානාටිය සූත්රයේ ආරක්ෂක නම් සිහිපත් කිරීම
තුන්වෙනි පිළිවෙත, අමනුෂ්ය ප්රශ්න සඳහා විශේෂයෙන්ම බලගතු ආරක්ෂාවක් සලසන ආටානාටිය සූත්රය හා සම්බන්ධයි.
වැරදි මත දුරු කරගැනීම:
පළමුව, “ආටානාටිය සූත්රයේ පළමු කොටසින් යකුන් ගෙන්වනවා, දෙවැනි කොටසින් පන්නනවා” යනු සම්පූර්ණ අසත්යයකි. මෙම සූත්රයේ අර්ථය නොදන්නා අය පතුරුවන මිත්යාවකි. සැබවින්ම, මෙම සූත්රයෙන් කියවෙන්නේ, සතරවරම් දෙවිවරුන් යටතේ සිටින යක්ෂ, නාග, කුම්භාණ්ඩ, ගන්ධබ්බ සේනාධිපතීන් බුදුරජාණන් වහන්සේට පොරොන්දු වීමක් පිළිබඳවයි.
එනම්, පන්සිල් රකින, ධර්මයේ හැසිරෙන අයට යම් අමනුෂ්යයෙකුගෙන් හිංසාවක් වේ නම්, තමන්ව සිහිපත් කළ විට තමන් පැමිණ ඒ දුෂ්ට අමනුෂ්යයන්ව රැගෙන ගොස් දඬුවම් කරන බවයි. පළමු සූත්රයේ දෙවිවරුන් මෙය ප්රකාශ කරන අතර, දෙවැනි සූත්රයේ බුදුරජාණන් වහන්සේ එම සිදුවීම භික්ෂූන් වහන්සේලාට දේශනා කරනවා.
කළ යුතු ආකාරය: සම්පූර්ණ සූත්රයම සජ්ජායනා කිරීම අවශ්ය නැහැ. කළ යුත්තේ මෙයයි:
- ඔබගේ දෛනික පිරිත් සජ්ජායනාව (පළමු පිළිවෙත) අවසන් කළ පසු, දෙවියන්ට සහ ඥාතීන්ට පින් අනුමෝදන් කර අවසන් වූ පසු,
- ඔබට ඇති අමනුෂ්ය ප්රශ්නය (උදා: “මට යක්ෂයෙකුගෙන් බලපෑමක් තියෙනවා”, “ගෙදරට කොඩිවිණ කරලා තියෙනවා”) පැහැදිලිව, හඬ නගා ප්රකාශ කරන්න.
- ඉන්පසුව, ආටානාටිය සූත්රයේ සඳහන් වන බුද්ධ, ධම්ම, සංඝ සරණ ගිය යක්ෂ සේනාධිපතීන්ගේ පහත නම් 39, හඬ නගා තුන් වතාවක් සජ්ජායනා කරන්න.
ඉන්දෝ සෝමෝ වරුණෝ ච, භාරද්වාජෝ ප්රජාපතී, චන්දනෝ කාම සෙට්ඨෝච, කින්නුගණ්ඩූ නිගණ්ඩූච, පනාදෝ ඕපමඤ්ඤෝච, දේවසූතෝච මාතලී, චිත්තසේනෝච ගන්ධබ්බෝ, නළෝරාජා ජනෙසභෝ, සාතාගිරෝ හේමවතෝ, පුණ්ණකෝ කරතියෝ ගුලෝ, සීවකෝ මුචලින්දෝච, වෙස්සාමිත්තෝ යුගන්ධරෝ, ගෝපාලෝ සුප්පගේදෝච, හිරිනෙත්තීච මන්දියෝ, පංචාලචණ්ඩෝ ආළවකෝ, පජ්ජුන්නෝ සුමනෝ සුමුඛෝ දදී මුඛෝ. මණිමානී චරෝ දීගෝ, අථෝ සෙරිස්සකෝ සහ.
මෙය උදෑසන සහ සවස යන දෙවරේදීම, පිරිත් සජ්ඣායනාවෙන් පසු අනිවාර්යයෙන්ම සිදු කළ යුතුයි. ටික කලක් යන විට ඔබගේ ප්රශ්න ස්ථිරවම විසඳෙන බව අප ප්රත්යක්ෂයෙන් දනිමු. මෙම පිළිවෙත කරන විට පළමු සහ දෙවැනි පිළිවෙත් ද අනිවාර්යයෙන්ම අනුගමනය කළ යුතුයි.
හතරවෙනි පිළිවෙත: සූනියම් දෙවියන්ට කන්නලව් කර භාර වීම
සිව්වන පිළිවෙත වන්නේ සූනියම් දෙවියන්ට (ගම්භාර දෙවියන් ලෙසද හඳුන්වන) පහනක් තබා භාර වීමයි. මෙහිදී ද වැරදි මත රාශියක් පවතී.
වැරදි මත:
- “රෑ 9.00ටම පහන තියන්න ඕනේ” – මෙය අවශ්ය නැත.
- “සූනියම් දෙවියෝ දවල්ට යක්ෂයෙක්, රෑට දෙවියෙක්” – මෙයද අසත්යයකි. සූනියම් දෙවියන් යනු තවුතිසා දිව්ය ලෝකයේ වෙසෙන භාවනානුයෝගී දෙවියෙකි. උන්වහන්සේ යටතේ සේවය කරන යක්ෂ සහ දේව සේනා සිටින අතර, ඔවුන් තමයි මිනිසුන්ට පිහිට වීමට පැමිණෙන්නේ.
- “ගේ ඇතුළේ පහන තියන්න හොඳ නෑ” – ගේ ඇතුළේ හෝ එළියේ පහන තැබීම ගැටළුවක් නොවේ. නමුත් ගේ ඇතුළේ තබන්නේ නම්, බුදු පහනට සම මට්ටමින් හෝ ඉහළින් නොතැබීමට වගබලා ගන්න. විශ්වයේ කිසිවෙක් බුදු කෙනෙකුට සමාන කළ නොහැක.
භාර විය යුතු නිවැරදි ආකාරය:
මෙය පඬුරක් ගැටගැසීමක් නොව, කන්නලව්වක් එනම්, බැගෑපත් ඉල්ලීමක් කිරීමකි.
උදෑසන බුද්ධ පූජාව, පිරිත් සහ ආටානාටිය පිළිවෙත අවසන් වූ පසු, සූනියම් දෙවියන් උදෙසා වෙනම ස්ථානයක පහනක් දල්වා, සුවඳ මල් (විශේෂයෙන් පිච්ච මල්) සහ හඳුන්කූරක් පූජා කරන්න.
ඔබගේ ප්රශ්නය පැහැදිලිව, හඬ නගා කියන්න. (උදා: “සූනියම් දේවතාවුන් වහන්ස, මට යක්ෂයෙකුගෙන් බලපෑමක් තියෙනවා…“)
ඉන්පසු මෙසේ භාර වන්න: “මෙම ප්රශ්නය ඔබ වහන්සේ මට විසඳා දුන්නොත්, මම ඔබ වහන්සේට භාර වෙනවා, ඇප වෙනවා, කැප වෙනවා, මේ ගෞතම බුද්ධ ශාසනය වෙනුවෙන් මාගේ වත්කම අනුව (ඔබට අවංකව කළ හැකි දෙයක් සඳහන් කරන්න – උදා: රු. 10,000ක මුදලක් පන්සලකට පූජා කරනවා / සිමෙන්ති කොට්ට 10ක් ආරාණ්යයකට ලබා දෙනවා / වනගත ස්වාමීන් වහන්සේ නමකට දානයක් පූජා කරනවා) යම්කිසි පින්කමක් සිදු කිරීමට. එම පින්කමෙන් ලබන සතුටින් මම ඔබ වහන්සේටත්, ඔබ වහන්සේ යටතේ සිටින සියලු දේව සහ යක්ෂ සේනාවටත් පින් අනුමෝදන් කරනවා.“
මෙම කන්නලව්ව සහ භාරය, උදේ සහ සවස, ප්රශ්නය විසඳෙන තුරුම සෑම දිනකම සිහිපත් කළ යුතුයි.
ඔබගේ ප්රශ්නය විසඳුනු පසු, ඔබ භාර වූ දෙය අනිවාර්යයෙන්ම ඉටු කළ යුතුයි. එසේ නොකළහොත්, ඔබට ඊට වඩා විශාල ප්රශ්න වලට මුහුණ දීමට සිදුවිය හැකිය.
මතක තබා ගන්න, අපි දෙවිවරුන් සරණ යන්නේ නැහැ. අපි ප්රතිපත්තියක පිහිටා, ඔවුන්ගෙන් අපගේ ප්රශ්න විසඳා ගැනීමට උපකාරයක් පමණක් ඉල්ලා සිටිනවා.
පිළිවෙත් අනුගමනය කිරීමේදී ඇතිවිය හැකි බාධා සහ ඒවාට මුහුණදෙන ආකාරය
මෙම පිළිවෙත් හතර අනුගමනය කරන විට ඔබට යම් යම් අත්දැකීම් වලට මුහුණ දීමට සිදුවිය හැකිය. ඒ ගැන දැනුවත් වීමෙන් නොසැලී ඉදිරියට යාමට ඔබට ශක්තිය ලැබේ.
- වැඩපිළිවෙල එපා වීම: මෙම ලිපිය කියවන විට පවා, “මේවා කරන්න පුළුවන්ද?” කියා ඔබට සිතෙන්නට පුළුවන්. ඔබ පිළිවෙත් ආරම්භ කළ විට, ඒවා කරගෙන යන විට, එය එපා කරවීමට, කම්මැලි කිරීමට ඔබ තුළම සිතුවිලි ඇතිවිය හැකිය. මෙය ඔබ ගාවම සිටින අමනුෂ්ය බලවේගය විසින්ම ඇතිකරන බාධාවකි. එයට හසු නොවී, ධෛර්යයෙන් යුතුව ඉදිරියටම යන්න.
- තාවකාලිකව රෝගාබාධ ඇතිවීම: පිළිවෙත් ආරම්භ කළ විට උණ, ඇඟපත වේදනා වැනි රෝග ඇතිවීමට ඉඩ තිබේ. එවැනි අවස්ථාවක, එය අමනුෂ්ය බලපෑමක්ද නැතිනම් සාමාන්ය රෝගයක්දැයි දැනගැනීමට, රතන සූත්රය හත් වතාවක් හෝ ඊට වැඩි වාර ගණනක් සජ්ඣායනා කරන්න. එය අමනුෂ්ය බලපෑමක් නම්, ක්ෂණයකින් සුවය ලැබේ. සුව නොවන්නේ නම්, එය සාමාන්ය රෝගයක් බැවින් වහාම වෛද්යවරයෙකු හමුවන්න. අමනුෂ්යයන්ට දිගු කලක් රෝග පවත්වාගෙන යා නොහැක.
- වශී ගුරුකම් සහ කොඩිවිණ සඳහා විශේෂ පිළියම්: ඔබට වශී ගුරුකමක් හෝ කොඩිවිණ බලපෑමක් ඇති බවට සැක නම්, දෛනික පිරිත් සජ්ජායනාවට අමතරව, ජලනන්දන පිරිත 21 වතාවක් හෝ ඊට වැඩි වාර ගණනක් සජ්ජායනා කරන්න.
- පිරිත් පැන් සහ පිරිත් නූල්: ඔබ පිරිත් කියන විට, වතුර බෝතල් කිහිපයක් සහ පිරිත් නූල් බෝලයක් තබාගෙන පිරිත් කරන්න. එම පිරිත් පැන් උදේ හවස පානය කරන්න. සතියකට වරක්, පරණ පිරිත් නූල ඉවත් කර, අලුත් නූලක් “සබ්බේ බුද්ධා බලප්පත්තා…” ගාථාව කියා අතේ ගැට ගසාගන්න.
- ගෘහස්ථ ප්රශ්න වැඩිවීම: සමහර අවස්ථාවලදී, පිළිවෙත් ආරම්භ කළ විට පවුලේ ආරවුල්, ආර්ථික ප්රශ්න තාවකාලිකව වැඩිවිය හැකිය. මෙයද ඔබව අධෛර්යමත් කිරීමට අමනුෂ්යයන් විසින් කරන කඩාකප්පල්කාරී ක්රියාවකි. නොසැලී, ප්රඥාවෙන් යුතුව පිළිවෙත් කරගෙන යන්න. එම ප්රශ්න ද නිරාකරණය වනු ඇත.
- නිවස පිරිසිදුව තබා ගැනීම: මෙම පිළිවෙත් කරන අතරතුර, නිවස පිරිසිදුව තබා ගැනීම ඉතා වැදගත්. උදේ සවස නිවසට කහ වතුර ඉසීම සහ සුවඳ දුම් ඇල්ලීමෙන් යහපත් පරිසරයක් නිර්මාණය වේ.
අවසාන අවවාද සහ සැලකිලිමත් විය යුතු කරුණු
මෙම ධර්මානුකූල වැඩපිළිවෙල සාර්ථක කරගැනීම සඳහා ඔබ විසින් සැලකිලිමත් විය යුතු කරුණු කිහිපයක් තිබේ.
- දේවාල සහ අඳුන් බැලීම් වලින් වළකින්න: මෙම පිළිවෙත් හතර අනුගමනය කරන කාලය තුළ, කිසිදු දේවාලයකට යාමෙන්, අඳුන් බැලීමෙන්, හෝ වෙනත් ගුප්ත ක්රම අත්හදා බැලීමෙන් වළකින්න. ඔබ යා යුත්තේ ඔබේ ගමේ පන්සලට, ආරණ්ය සේනාසනයකට හෝ සොළොස්මස්ථාන වැනි පූජනීය ස්ථානයකට පමණි.
- වෛද්ය ප්රතිකාර නතර නොකරන්න: ඔබට යම් ශාරීරික රෝගයක් ඇත්නම්, මෙම පිළිවෙත් කරන අතරතුර වෛද්ය ප්රතිකාර (සිංහල හෝ බටහිර) කිසිසේත්ම නතර නොකරන්න. මෙම පිළිවෙත් මගින් සිදු කරන්නේ, බෙහෙත් ඇඟට උරාගැනීමට බාධා කරන නොපෙනෙන බලවේග ඉවත් කිරීමයි. ඉන්පසු, වෛද්ය ප්රතිකාර වලින් ඉක්මන් සුවය ලැබේ.
- බොරු කට්ටඩින්ට අසු නොවන්න: ලක්ෂ ගණන් වියදම් කර යන්ත්ර මන්ත්ර දැමීමට අවශ්ය නැත. ඔබගේම මුවින් පිරිත් කියා, ඔබගේම අතින් නූලක් ගැට ගසාගැනීමේ ශක්තිය ඊට වඩා ප්රබලයි. මෙම වැඩපිළිවෙලට කිසිදු වියදමක් නැත; ප්රතිඵල ලැබුනොත් පමණක් ඔබ භාරය ඔප්පු කළ යුතුය.
- මස් මාළු අනුභවය: මස් මාළු අනුභව කිරීම හෝ නොකිරීම මෙම පිළිවෙත් වලට බාධාවක් නොවේ. එය ඔබගේ පෞද්ගලික තීරණයකි.
- ‘කිලි’ බල නොපායි: කාන්තාවන්ගේ මාසික ඔසප් වීම වැනි කිලි ලෙස සැලකෙන කිසිදු දෙයක් මෙම ධර්ම පිළිවෙත් වලට බාධාවක් නොවේ. බියෙන් තොරව ඕනෑම දිනක මෙම පිළිවෙත් අනුගමනය කළ හැකිය.
- සුව වීමෙන් අනතුරුව: ඔබගේ ගැටලුව විසඳී, ඔබගේ භාරය ඔප්පු කිරීමෙන් අනතුරුව ඔබට තේරීමක් ඇත. එතුමන්ගේ උපකාරයට ස්තූති කරමින්, දිනපතා සිදුකරන පහන් පූජාව නවත්වන බව ඔබට සූනියම් දෙවියන්ට ගෞරවයෙන් දැනුම් දිය හැකිය. කෙසේ වෙතත්, පළමු පිළිවෙත් දෙක වන පිරිත් සජ්ජායනය කිරීම සහ මෙත් වැඩීම යන පිළිවෙත් ඔබගේ ජීවිත කාලයටම ඉතා ප්රයෝජනවත් වේ. එමඟින් පින් රැස් වන අතර, එය මානසික සැනසීම ගෙන දෙන මෙන්ම, ඔබගේ ආධ්යාත්මික දියුණුවටද සහය වේ.
- සමථ-විදර්ශනා භාවනාවේ ශක්තිය: අපගේ ඉගැන්වීම් වල මූලික අරමුණ වන්නේ සමථ භාවනාව ඔස්සේ තෙවැනි ඇස වැනි ආධ්යාත්මික හැකියාවන් දියුණු කරගැනීමයි. එසේ දියුණු කරගත් සිතක ශක්තියට (චිත්ත ශක්තිය), ලෝකයම එකතු වී කරන ගුරුකම් වලටවත් බලපෑම් කළ නොහැක.
- මධ්යස්ථ දැක්මකින් සිටින්න: වැදගත්ම අවවාදය මෙයයි. පළමුව ඔබට ඇතිවන සෑම ප්රශ්නයක්ම අමනුෂ්යයන් නිසා සිදුවන්නක් යැයි සිතන අන්තයට යන්න එපා. දෙවනුව අමනුෂ්යයන් කියා කොටසක් නැතැයි සිතන අනෙක් අන්තයටද යන්න එපා. සමහර රෝග, බුදුරජාණන් වහන්සේට පවා විපාක දුන් අතීත කර්ම නිසා හටගන්නා ඒවා විය හැකිය. එබැවින්, මධ්යස්ථව සිතා, මෙම පිළිවෙත් අනුගමනය කරන අතරම, වෛද්ය ප්රතිකාර ලබාගන්න. ධර්මය ශ්රවණය කරන්න. එවිට ඔබට නිවැරදි අවබෝධය සහ මානසික සහනය ලැබෙනු ඇත.
මෙම ලිපියෙන් අප ඔබට ඉදිරිපත් කළේ, අමනුෂ්ය ප්රශ්න සඳහා නිවසේදීම, කිසිදු වියදමකින් තොරව, ප්රායෝගිකව අත්හදා බලා 100%ක් සාර්ථක ප්රතිඵල ලබාගත හැකි, බුදු දහමට අනුකූල පිළියම් මාලාවකි. කිසි දෙයකට බිය නොවී, සැක නොසිතා, ශ්රද්ධාවෙන් හා උත්සාහයෙන් මෙම පිළිවෙත් හතර අනුගමනය කරන්න. ඔබ ඒවා ආරම්භ කළ මොහොතේ සිටම ඔබට සහනයක් සහ සැනසීමක් දැනෙන්නට පටන් ගනු ඇත.
මෙම ධර්ම මාර්ගය ඔස්සේ ඔබගේ සියලු ප්රශ්න නිරාකරණය වී, තුණුරුවන්ගේ අනන්ත ගුණ බලයෙන් ඔබට ආරක්ෂාව, සැනසීම සහ යහපත උදා වේවා!
වන්දනා පොත: කියවන්න
මේ උතුම් මඟෙහි අප සමඟ එක්ව ගමන් කිරීමට ඔබටත් අපි ආරාධනා කරමු. අපගේ ඉගැන්වීම් කියවා, සියල්ලටම වඩා වැදගත් ලෙස, ඒවා ඔබගේ ජීවිතයට ප්රායෝගිකව යොදාගන්න. ඔබ ලබන අත්දැකීම් සහ ඔබට ඇතිවන ගැටළු, අපගේ ලිපියට පහළින් ඇති අදහස් තීරුවේ සටහන් කරන ලෙස අපි ඔබව දිරිමත් කරන්නෙමු. ඔබ අසන ප්රශ්න, ඔබගේ අවශ්යතාවලටම ගැලපෙන ලෙස ඉදිරි ලිපි සහ වීඩියෝ සකස් කිරීමට අපට මහත් උපකාරයක් වනු ඇත. එමෙන්ම, වෙබ් අඩවියේ ඇති ‘Contact Us‘ පෝරමය හරහා ද ඔබට අප හා සම්බන්ධ විය හැකිය.
අපගේ මෙම උත්සාහය, ඔබ තුළ සැඟවී ඇති ආධ්යාත්මික බීජය, එනම් සමාධිය, ධ්යාන සහ අභිඥා වැනි ගුණාංග පෝෂණය කිරීමයි.
අප සමඟ එක් වූ ඔබට ස්තූතියි. මෙම වෙබ් අඩවිය ඔබගේ අධ්යාත්මික ගමනට මහත් ශක්තියක් වනු ඇතැයි අපි බලාපොරොත්තු වෙමු.
ඔබ සැමට තෙරුවන් සරණයි!
